رح أتكلم لكم شوي عن المادة الصيفية اللي أخذتها..
أول شي الاسم ماله علاقة باللي أخذناه، احنا درسنا Material Application لكن هم دمجوا الكورسين سوا والقصة انو قبل الصيف كان في مشكلة في الجداول وانو احنا أخذنا هذي المادة من قبل لكن قبل لا نتخصص فكانت تتكلم عن مواد البناء والصبغ والخشب وكذا أشياء مالها علاقة بتخصصنا أبداً. الدفعات اللي بعدنا تحسن وضعهم وعطوهم شي مفيد جداً وحبينا ناخذه عشان نستفيد المهم انو قصة لين غيروا اسمها ونزلت المادة والحمدلله.
أول مابدينا كان حماس وكذا بعدين بدا معدّل الشغل يزيد بشكل مزعج لكن الحقيقة انها كانت مفيدة جداً وتمنيت لو أخذتها من قبل كانت بتفيدني بكورسات ثانية.
الهدف الأساسي منها انها تعلمك طرق مختلفة ومواد مختلفة وكيف تتعامل معها، وركزنا بشكل أساسي عالورق.
أخذنا تقريباً ٩ مشاريع خلال شهرين وهي كمية دسمة بمعدل مشروع كل أسبوع.
أكثر مشروع استمتعت فيه كان عجينة السراميك وعجينة الورق وأظن المشاريع تتكلم أحسن مني :$
الشي اللي أشوفه يفرق بين بنت من كلية التصاميم وبنت من أي قسم ثاني هو مهاراتها اليدوية، التخصص هذا يجبرك تستخدم يدينك وتهتم بتفاصيل كثيرة غيرك ماينتبه لها. تعجبني هذي المهارات لأنها تفيدني بحياتي بشكل عام مش بس بالجامعة، مثلاً لمن أجي أنسق شي أعرف كيف أختار القطع بشكل مبتكر، أعرف كيف أتخيل الشكل براسي قبل لا أشوفه.
برضو مثلاً لمن تصادفني مشكلة، مافي شي مستحيل وكل شي له تصريفة وحل، الكورس هذا أكد على هالشي جداً. أحياناً كان في مشاريع لازم أسويها قبل بيوم عشان تنشف ويصير عندي وم واحد بس ألون وأضبط الفنشنق فتصير أخطاء مافي وقت تعدلها ولازم مخك يشتغل بسرعة وتفكر في حل بديل سريع لأنو التسليم تسليم والتأخير مش ف صالحك أبداً وعلى قولة مس ندى "اللي عطتنا الكروس" من كان له حيلة فليحتال :)
بالطبخ بالخياطة بتنسيق الحفلات والديكور بالتفاصيل اللي تعطي لمسات جميلة وفخمة للأشياء. هذا الشي ممكن يكون موهبة أو شي فطري لكن تخصص التصميم ينميها ويصقلها.
هذا رابط للبورتفوليو اللي سلمناه بنهاية الكورس للي حاب يطلع على نوعية الشغل اللي سويناه
مشاهدة ممتعة وأنتظر تعليقاتكم :)
ليست هناك تعليقات:
إرسال تعليق